John 13

Barevare-nupoong Sipurira Jiisuuꞌ Bauma-anko Toroaravaing Nauvuruꞌnaꞌ

(13:1–17:26)

Jiisuuꞌke Bakaning Barevare-nupoong Kauꞌ Duuꞌpuruꞌnaꞌ

1Aung aaꞌ tee enang koreꞌnooꞌnaꞌmung Baariꞌkoong~ Paroro-koo. Jiisuuꞌke noruꞌuuꞌ bakaang doong makotuioꞌ aung-eta kansiꞌketa tenkenuainooꞌ Bauma-anko nanuuꞌnaang. Teie kansiꞌkoo otoitaaꞌ bakaning doong kante piaavurikoꞌ bera bouꞌnaꞌmung-koo basinooꞌ.

2Eeꞌnoko Jiisuuꞌ niiꞌ bakaning barevare-nupoong ninka taamang-koo baꞌnamariruꞌ. Eeꞌnoko Sietaniꞌke Judasi Kerioꞌnung, Saimoniꞌ bauring, tero maamu-antavuuꞌ Jiisuuꞌ sivuuꞌnaang kare-nupoong-koo. 3Jiisuuꞌke koontoꞌ noruꞌuuꞌ Baumai iirakuta ookara kapooꞌkoo makosinaꞌ avuuꞌnung, eeꞌnoko noruꞌuuꞌ Kumponing-eta pouꞌnung, eeꞌnoko napoꞌ Kumponing-anko toroaraaꞌnaang. 4Eeꞌnoko tee, Jiisuuꞌke taamang bantoꞌniiꞌ sipura daaꞌaruꞌ, eeꞌnoko bakaang mononopaꞌ kiruꞌarara tauro meuꞌke kapeto tokoaruꞌ. 5Eeꞌnoko ntong diisi-koo kooꞌuraiꞌnange niiꞌ niikaang kauꞌ duuꞌ tutumuruꞌ. Eeꞌnoko napoꞌ teie tauroi tokoaruꞌnunge piuꞌmuruꞌ.

6Eeꞌnoko tee Jiisuuꞌ Saimoniꞌ Piita-anko basiarako Piitai aaꞌpuuꞌ, “Ovoring, nkaang ee kauꞌ duuꞌmeeꞌnaang?” 7Eeꞌnoko Jiisuuꞌke makuꞌuma aaꞌpuuꞌ, “Dake enang kapooꞌ noruꞌeaꞌ nkoamaaꞌnomaung. Damaꞌke noruꞌeaing.”

8Eeꞌnoko Piitai aaꞌpuuꞌ, “Dake nkaang kauꞌ koontoꞌ duuꞌmeaukaꞌnung.” Eeꞌnoko Jiisuuꞌke makuꞌuma aaꞌpuuꞌ, “Daꞌ ninge duuꞌdamparuko deekoꞌ nkaning-koong barevare-nupoong-koong deentaravaukaꞌnung.” 9Eeꞌnoko Saimoniꞌ Piitai aaꞌpuuꞌ, “Ovoring, nkaang kauꞌ narung duuꞌmeaukaꞌnung, bireng duuꞌmeainge; boreꞌ duuꞌmeainge.” 10Jiisuuꞌke aaꞌpuuꞌ, “Naning tee mono duuꞌparinung ookara mono kiiroraaꞌaring. Napoꞌ duuꞌparavaung. Bakaang kauꞌ narung duuꞌparavaing. Diiꞌ kuꞌmiꞌdoriaꞌ, nka ookara deeaꞌ.” 11Jiisuuꞌke tero noruꞌuuꞌ tee naning kare-nupoong-koo sivuainung. Teeꞌkoo eeꞌnaꞌkoo aaꞌpuuꞌ, “Diiꞌ ookara kiiroraaꞌdariri otoriaꞌ.”

12Eeꞌnoko Jiisuuꞌke kauꞌ duuꞌ bakemuriraiꞌnange Jiisuuꞌ mononopaꞌ napoꞌ siparara bakanooꞌ taamantoma toroaruꞌ. Teka Jiisuuꞌke niaꞌmurima aaꞌmuruꞌ, “Diiꞌke ee noruꞌeri otong tee kapooꞌ nkorampiring? Tasiꞌperinge? 13Diiꞌke ning Nau-anta eeꞌnoko Ovoring tammerimaung. Ning tee eeꞌnara. Tampaꞌ miring tammerimaung. 14Ning diikaang Ovoring, eeꞌnoko Nau-anta eeꞌnoko ninge eeꞌnarai kauꞌ duuꞌdampiring. Diiꞌ teeꞌ napoꞌ boonko noruꞌdariri pakureeriainge. 15Aung diiꞌ nau-anta-koo teeꞌ nkorampiring diiꞌ pakureeriiꞌnaang pakurampirinaꞌ. 16Masikaꞌ naurampimang, naning botovotonaaꞌ bakaang pankaing-koo dau basi deeaꞌ, eeꞌnoko naning kara-okovui-nka tee botovuuꞌnung-koo dau basi deeaꞌ. 17Aung kara taaraveriraiꞌnange teeꞌ nkoverima biraanke-nupoong otoriaing.

18“Ninge diiꞌ ookara koontoꞌ naurampiaꞌ. Ninge barearantuꞌning noruꞌaransi oꞌnong. Eeꞌnoko aung Daari Meekung nauꞌka masikung deemparaaꞌnaang aaꞌpumaung,

‘Teie naninge nariꞌ taamanampemaunge tamaavaꞌnaang simuuꞌ.’
(Kena 41:9)

19Enang naurampimang mmeꞌ nkoaravaruko diiꞌke masikaꞌantameriiꞌnaang ning tee eeꞌnara pankaing tenang nkoaravainang. 20Masikaꞌ naurampimang, baa tee ninge botoampainung onkeonkeꞌuaing tee ning napoꞌ onkeonkeꞌmuaing. Eeꞌnoko naning tee ning onkeonkeꞌmuaing tee ning botomuuꞌnung onkeonkeꞌuainge.”

Jiisuuꞌke Tero Nauvuruꞌnaꞌ Naninge Tooꞌdempuainaꞌ

(Mat 26:20-25; Mak 14:17-21; Luk 22:21-23)

21Teketa Jiisuuꞌke teeꞌ minkuvuraiꞌnange domang orakaꞌ deeꞌouꞌ, eeꞌnoko siraꞌpui naumurima aaꞌmuruꞌ, “Ninge masikaꞌ naurampimang diiꞌ, narunge diiꞌkoonge tooka kompui ning kare-nupoong-koo simuaing.”

22Jiisuuꞌke teeꞌ minkuvuioꞌ niiꞌ niiꞌka ooꞌoomeeruꞌ avitoitoi noruꞌampima, miruꞌnooꞌ besiꞌampima. 23Ning~ Jiisuuꞌkoo dueꞌ baꞌnamarakoꞌ baꞌmaikoꞌ deemaritaaꞌ. 24Eeꞌnoko Saimoniꞌ Piitai birenge pinkaꞌmuma aaꞌmuuꞌ, “Niaꞌeai tee baa teeꞌ minkuvumaang.” 25Teeꞌ niaꞌmuko Jiisuuꞌanko diiriꞌmarara niaꞌantuꞌ, aaꞌpama, “Ovoring, tee baa eeꞌnara?”

26Jiisuuꞌke makuꞌmuma aaꞌmuuꞌ, “Ninge navioꞌ duuni-koo iimpamira tee avompainung, tee eeꞌnara tee naning.” Enang teeꞌ minkuvura navioꞌ nkavura iimpura Judasi avuuꞌ, Saimoniꞌ Kerioꞌnung bauring. 27Eeꞌnoko Judasie tevioꞌ kompuko Sietaniꞌ namuꞌke tumparuꞌ Judasi-koo kuung. Eeꞌnoko Jiisuuꞌke aaꞌpuuꞌ, “Kapooꞌ nkoveainung iriꞌnarung nkoveaing.”

28Teeꞌ minkuvuuꞌnung-koong miruꞌnooꞌ niiꞌke taamantomai baꞌnamariri oꞌnorikoꞌninge noruꞌampiaruuꞌ. 29Niiꞌninge aaꞌpauꞌ, “Tee Judasie kapooꞌ mooꞌuuꞌnaang paroro-koo makosi Jiisuuꞌke teeꞌ minkuvumaang,” Judasie mooniꞌkoonaraꞌ bakura-naraꞌ tarevukoꞌnung-koo. Eeꞌnoko niiꞌninge eeꞌ noruꞌauꞌ, “Tee Jiisuuꞌke botovuing sitovuruꞌnuka kapooꞌ avuriiꞌnaang.” 30Judasie tevioꞌ nkavura namuꞌke siaruꞌ, tenang muunga.

Jiisuuꞌke Nerakung Boto Sipuuꞌnaꞌ

31Teketa Judasi tenkenuioꞌ Jiisuuꞌke aaꞌmuruꞌ, “Enang ning Tee Naning-naumpoꞌ Paning-etaing nkaang meenasi siraꞌpari otong, eeꞌnoko Kumponing bakaang meenasi ning-koo siraꞌpari otong. 32Ninge Kumponinge pankaing-antavansioꞌ teie ning napoꞌ bakaang meenasi amura pankaing-antamuuꞌnaang. Eeꞌ, emuꞌ dueꞌka teeꞌ nkomuaing. 33Nnurukaaꞌ ee, ning diiꞌ ninka baruꞌ pankaroong oꞌnoriaukaꞌnung. Diiꞌke damaꞌke besiꞌmeriaing, eeꞌnoko Juꞌkoong ovontung nauarantuꞌnaꞌ enang naurampimang, ning nanampainooꞌ diiꞌ poriarupeuꞌ. 34Nerakung boto arompimaang: Piaareeriaing diiꞌka. Teeꞌ ninge diiꞌ piaarampimanaꞌ diiꞌka piaareeriaing. 35Diiꞌke diiꞌka teeꞌ piaareeriko ookara nantoonge tasiꞌdaaripeuꞌ diiꞌ nkaning barevare-nupoong.”

Piita Penkemparavainaꞌ Jiisuuꞌkoo Jiisuuꞌke Tero Nauvuruꞌnaꞌ

(Mat 26:31-35; Mak 14:27-31; Luk 22:31-34)

36Teketa Piitai aaꞌpuuꞌ, “Ovoring, areꞌaape nanimang?” Jiisuuꞌke makuꞌuma aaꞌpuuꞌ, “Dake ning siomearupeuꞌ enang nanamatomanooꞌ, nka damaꞌ niiꞌnang siomeriaing.”

37Piitai niaꞌuma aaꞌpuuꞌ, “Aming-koo ninge siontamparupeuꞌ enang? Ning daꞌ ninka booꞌkoo makotunsi oꞌnong.” 38Jiisuuꞌke makuꞌuma aaꞌpuuꞌ, “Daꞌ ee koontoꞌ ning-koo booꞌkoo makosi? Bakei koontoꞌ masikaꞌ nauramaang, kokoreeꞌ mmeꞌ kooꞌkuaruko daꞌ beemuꞌpie penkentaravaing niꞌninka nariꞌ oꞌnoremaung-koo.”